Sentraal behaal spog-oorwinning oor Northerns
DIE rugbyspan van Hoërskool Sentraal het ‘n houvas wat Noord-Kaap van Kimberley oor hom sedert 2010 gehad het Saterdag op Brandfort se jaarlikse sportdag verbreek. Die Tralies was 20-12 in die wedstryd baas.
Dié oorwinning sal ook die span se selfvertroue help nadat hy Maandag teen Landboudal van Jacobsdal 19-26 aan die verloorkant was. Die kragmeting het laat begin weens vervoer probleme wat die span van die Diamantstad ondervind het. Die span se bus het twee keer tot stilstand gekom weens gebarste buitebande. Die kragmeting is ook verkort tot ‘n eerste helfte van 24 minute en ‘n tweede helfte van 17 minute.
Vir Tralies het sy stut, Lafras Bekker uitmuntend vertoon. Hy het die bal goed gedra, terwyl hy en Doctor Booysen van Northerns mekaar ‘n opdraende stryd in die skrums gegee het. Die losskakel, DP de Lange het agterlangs ‘n stewige vertoning gelewer.
Fichardtpark het op die sportdag ‘n sege van 22-13 oor die Afrikaanse Hoërskool Kroonstad behaal. Die span wat deur Dirkie Groenewald gebrei word het ook Maandag ‘n goeie vertoning teen Diamantveld van Kimberley opgesit. Die span van die Diamantstad het 21-14 gewen.
Vir Fichies was sy losskakel Stefan Klopper Saterdag ‘n staatmaker. Hy het 17 punte met sy skopskoen bygedra.
‘n Driekuns deur die skrumskakel en kaptein van Hentie Cilliers, Jaywinn Juries het sy span tot ‘n sege van 43-0 oor Zastron aangevuur. Juries is ‘n speler wat vanjaar ‘n sterk aanspraakmaker op ‘n plek in die nasionale skolespan behoort te maak.
Voorlangs het Damain May op flank ook goed vertoon, terwyl die heelagter Ezrick Alexander ‘n hele paar gevaarlike aanvalle vanuit die laaste vesting geloods het.
Hennenman het met sy vleuel Mzwake Xalisa aan die spits vir die Hoër Landbouskool Hendrik Potgieter van Reddersburg 27-14 geklop. Mzwake het twee drieë gedruk, met twee doelskoppe geslaag en ook ‘n strafdoel tussen deur die pale gejaag.
Diamantveld het ‘n sege van 20-11 oor Duineveld in Upington behaal. Vir die wenspan het sy losskakel, Gerco Nortjé sy skopskoene aangehad. Hy was met twee doelskoppe, ‘n strafdoel en ‘n skepdoel in die kol. Vir Duineveld het die flank Erik Jordaan, heelagter Ruan Matthews en stut Stefan Hanekom goeie vertonings gelewer.
Louis Botha het op Jacobsdal sy seisoen met ‘n klinkende sege van 32-8 oor Landboudal afgeskop. Die span se losskakel, Ewan Adams het ‘n driekuns aan drieë behaal en ook ‘n persoonlike bydrae van 22 punte gelewer. Vir die wenspan het sy stut Joseph Dweba en flank Victor Maruping saam met Adams uitgeblink.
Sand du Plessis was te sterk vir Ficksburg op sy tuisveld en het 38-7 as oorwinnaars van die veld gestap. Die span se haker en kaptein Rudo Peens was saam met die agtsteman JB la Cock voorlangs sterre gewees. Reinhardt de Villiers kan op losskakel ook tevrede met sy vertoning voel.
In Klerksdorp het Jim Fouché sy seisoen ook op ‘n hoë not afgeskop deur Hoërskool Klerksdorp 26-0 te verslaan. Die span van die Rosestad het nie baie balbesit geniet nie, maar het sy kanse beter benut. Die voorspelers het goed verdedig met die stut Anton Noordman wat ‘n klop klop op die skouer verdien.
Agterlangs was die vleuel Thiardt Ingram en heelagter Danneel Stone uitstaande.
Puntemakers:
Sentraal 20 (13) – Drieë: SJ Wessels, AJ Page. Doelskoppe: DP de Lange (2). Strafdoele: De Lange (2). Noord-Kaap 12 (7) – Drieë: Thomas Fortuin, Gerhard Holtzhausen. Doelskop: Robbie Petzer.
Hentie Cilliers 43 (26) – Drieë: Jaywinn Juries (3), Damian May, Siyabonga Luwaca, Melton Wentzel, Emile Seconds. Doelskoppe: Juries (4). Zastron 0.
Fichardtpark 22 (16) – Drie: Erhard Smith. Doelskop: Klopper. Strafdoele: Klopper (5). AHS Kroonstad 13 (13) – Drie: Francois Stemmet. Doelskop: Jeandré Uys. Strafdoele: Uys (2).
Hennenman 27 (10) – Drieë: Mzwake Xalisa (2), Angelo Pienaar, Daniel Mokopane. Doelskoppe: Xalisa (2). Strafdoel: Xalisa. Hendrik Potgieter 14 (7).
Diamantveld 20 (7) – Drieë: Michael Rodrigues, Marno Willemse. Doelskoppe: Gerco Nortjé (2). Strafdoel: Nortjé. Skepdoel: Nortjé. Duineveld 11 (11) – Drie: Ryno Karstens. Strafdoele: Ruan Matthews (2).
Louis Botha 32 (10) – Drieë: Ewan Adams (3), Jeandré Christiaan, Dale Koopman. Doelskoppe: Adams (2). Strafdoel: Adams. Landboudal 8 (8).
Sand du Plessis 38 (26) – Drieë: Rudo Peens (2), Reinhardt de Villiers, Dale Nel, Gustav Greyling, JB la Cock. Doelskoppe: La Cock (4). Ficksburg 7 (0).
Jim Fouché 28 – Drieë: Thiardt Ingram (2), Marco Vermeulen, Strafdrie. Doelskoppe: Tiaan Schutte (4). Hoërskool Klerksdorp 0.
Theunissen 28 – Drieë: Sylvester Seseane (2), Atmuan Kok (2). Doelskoppe: Ennock Rakotsoane (4). Böhmer 7.
Landboudal 26 – Drieë: Kat Mabaleng, Erick Reinecke, CD Wilke, Petri Fourie. Doelskoppe: Reinecke (3). Sentraal 19 – Drieë: AJ Page, Stefano Eckhard, SJ Wessels. Doelskoppe: DP de Lange (2).
