SuperSport Schools Plus

Pumas grom, maar WP is te sterk

By Hannes Nienaber , in Rugby | News , at 2014-07-15

MIDDELBURG. – Die nie-amptelike kampioen van die Cravenweek-rugbytoernooi vir hoërskole, die Westelike Provinsie, moes harder sweet as verwag om die gasheer, die Pumas, Maandag hier met 33-32 te troef.

Dié oorwinning was die WP se sesde op ’n streep op die Cravenweek. Hy het ná ’n kliniese vertoning in die eerste helfte met 30-15 voorgeloop en ’n mens kon sien hoekom dié span se afrigter, Hein Kriek, as vanjaar se Suid-Afrikaanse Skole-afrigter aangewys is. KwaZulu-Natal (KZN) se Dean Moodley is die spanbestuurder.

Die WP se slot Ruben de Villiers en stut Gavin van den Berg het die bal sterk gedra, terwyl die kaptein en senter, Edrich Venter, die planmaker in die agterlyn was.

Die verskil tussen die twee spanne was die skopskoen van die heelagter, Tiaan Swanepoel, wat met al sewe sy pogings na die pale suksesvol was vir ’n bydrae van 18 punte.

Die Pumas se agtsteman, Oscar Schuld, en slot Driaan Bester het albei in die eerste helfte tien minute in die koelkas deurgebring.

* Suidwestelike Distrikte (SWD) het die eerste verrassing gelewer toe hy KZN welverdiend met 18-13 die loef afgesteek het.

SWD se senter JT Jackson en KZN se heelagter, Morné Joubert, se vertonings was waarskynlik die beste van die dag.

Jackson het amper na willekeur gapings in KZN se verdediging gevind, terwyl sy skopskoen ook ’n bate was. Joubert se vermoë op die aanval is sy sterkpunt.

* Miskien verdien die Griffons om op die derde dag in die hoofwedstryd te speel ná hul sege van 47-20 oor die Grens. Die Perses het sedert 2011 se toernooi in Kimberley nog net een keer verloor.

Die span het wel ’n insinking in die tweede helfte beleef nadat hy teen rustyd stewig met 42-6 in die saal was.

Die heelagter, Ezrick Alexander, se drie vanuit sy eie halfgebied was ongetwyfeld die beste op die eerste dag. Alexander en die slot Erik Knoetze het elk twee keer gaan druk. Knoetze het sy tweede drie gedruk nadat ’n strafdoel van Jaywinn Juries die regoppaal getref het. Knoetze het met albei sy drieë die verdediging met fopaangeë geflous.

* Toe die Oostelike Provinsie-platteland met nog drie minute se spel in die eerste helfte met 39-3 teen Zimbabwe voorgeloop het, sou ’n mens gedink het ons Noordelike bure gaan ’n drag slae kry. Hulle het egter ander planne gehad, maar steeds uiteindelik met 54-43 in ’n opwindende wedstryd verloor.

* Die Limpopo Blou Bulle en Griekwas-platteland het die toeskouers op een van die opwindendste openings-wedstryde in jare trakteer.

Albei spanne was nie bang om die bal lug te gee nie en Limpopo het met 25-19 gewen. Griekwas het met die omdraaislag met 19-13 voorgeloop.

Hannes Nienaber
error: Sorry ol' chap, those shenanigans are not permissible.