Preview – Vrystaat Kiewiete vs. Oos-Vrystaat
Die Vrystaatse Kiewiete behoort vanjaar weer ’n sterk aanspraakmaker op die titel as kampioen op die jaarlikse VKB-rugbyweek op Reitz te wees.
Die Kiewiete kom vandag op die Vrystaatse Bondedag teen die gasheer van die week, Oos-Vrystaat op Grey-kollege te staan.
Die Kiewiete word aangevoer deur die haastige vleuel, Lee-heane Ontong, wat vanjaar een van die voorste driedrukkers op skolevlak in Suid-Afrika is. Hy het vanjaar reeds 13 drieë in die Vrystaatse B1-liga gedruk.
Ontong het verlede jaar na afloop van die week op Reitz die sogenaamde “Suid-Afrikaanse Platteland-span” gehaal wat op die week gekies word. Ontong was ook in 2012 goed genoeg na die eerste Cravenweek-proewe van die Vrystaat geag om die unie se Cravenweek-span te haal. Hy het egter later uitgeval. Ontong is ook sy skool, President Steyn, se onderhoofseun.
Hy en die Steyners se heelagter, Abraham Nkuku, sal hulle kombinasie in die agterste driehoek saam met Henco Pieterse van Brandfort voortbou. Nkuku en Ontong het vanjaar verskeie spanne probleme op die verdediging besorg wanneer hulle besluit het om met die bal te hardloop.
Die losskakel, Eugene Strydom, behoort die agterhoede glad weg te stuur.
Soos die Sandveld staan die Oos-Vrystaat ook baie van sy spelers aan die Griffons se plattelandse Akademie-span af. Veral Reitz se twee senters, Hannes Aucamp en NP Linde, saam met Wilgerivier van Frankfort se flank Gerrie Muller kon ’n reuse verskil in die span gemaak het. Muller staan nog ’n kans om die Griffons se Cravenweek-span te maak indien hy ’n stewige vertoning vandag vir die Perses se Akademie-span teen die Akademie-span van Griekwa-platteland kan inkry. Verder speel Vrede se losskakel, Johan Esterhuizen vir die Perses se o.19-span.
Vir Oos-Vrystaat behoort ervare eerstespan spelers soos die heelagter, Edwin Gower en vleuel Ricardo Frade sleutelspelers te wees.
Die spanne is:
Vrystaat Kiewiete: Abraham Nkuku, Henco Pieterse, Zandré Groenewald, Chris de Jager, Lee-heane Ontong, Eugene Strydom, Berto van Rensburg, Kobus van Tonder, Fanie Griesel, Coenie Bezuidenhout, Janco Nel, Willie van Rensburg, Gideon Hendriks, BD van der Vyfer, Anthony Senekal. Plaasvervangers: André Nienaber, Barend Alexander, Marco van der Westhuizen, Juan Human, Hendrie van Dyk, Henco de Wet, Lukas Smith, Donovan Pretorius.
Oos-Vrystaat: Edwin Gower, Stean Marais, Willem Buys, Gavin Wolmarans, Ricardo Frade, JJ Dekker, GJ Janse van Rensburg, Rualt Keulder, Sean Herbst, Lourens Jooste, MJ Lourens, Drian Scheepers, Shantz de Waal, Johan Rossouw, Chris Meyer. Plaasvervangers: Willie Kruger, Jayson Booysen, Marius Barnard, Gerrie van der Merwe, Paul Terblanché, Jaco Pretorius, Morné Spies, Keegan Christians.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
