Noord-Kaap in geskiedkundige sege oor Waterkloof
HOËRSKOOL NOORD-KAAP se eerste rugbyspan het Saterdag nog ‘n bladsy in sy trotse geskiedenis geskryf. Die span het ‘n onwaarskynlike oorwinning van 34-30 oor Hoërskool Waterkloof van Pretoria op Pirates in Kimberley behaal.
Die span se dag is versuur deurdat sy flank, Luaan Dowie deur die skeidsregter Francois de Bruin vir vuilspel van die veld gestuur is. Die voorval het slegs na 15 minute se spel in die kragmeting gebeur. Northerns moes ook sonder sy beseerde kaptein en slot, Lehan Muller in die wedstryd ingaan.
Die span se afrigter, Henk Brand het sy span se vertoning as een van die bestes nog sedert hy afrigter van die span is beskryf. Die span se buitesenter, Dimitrio Tieties het laat in die kragmeting die wendrie gaan druk na Northerns vanuit sy eie kwartgebied ‘n aanval geloods het.
Die span se vleuel, Hillford Clarke het sy goeie spelpeil dié seisoen ook voorgesit. Hy het twee keer gaan druk.
Northerns het sedert 2008 op sy tuisveld Pirates in Kimberley nog nie die knie gebuig nie. Sy laaste nederlaag in die
Diamantstad was teen Landboudal van Jacobsdal in hulle ligawedstryd van daardie jaar.
Voorlangs het die stut Doctor Booysen, agtsteman Gerhard Holtzhausen en slot Thulani Njenje goed vir die wenspan vertoon. Die span se kaptein en senter, Luke Mason was egter sy span se beste speler op die dag. Hy was rotsvas op verdediging en het ook die verdediging goed georganiseer.
Diamantveld het Saterdag op die bes moontlike manier sy vertonings op die Wildeklawer-toernooi agter hom gesit. Die span van Kimberley het in Upington vir Hoërskool Upington 43-17 verslaan.
Voorlangs was die span se agtsteman, Jacques van Zyl soos gewoontlik op sy stukke. Agterlangs was die senterpaar Ruan Maritz en Jacques Nel verwoestend. Die losskakel Deon van Zyl verdien ook lof vir sy goeie stelskopwerk tydens die wedstryd. Die vleuel Jon-Pierre Abrahams mag ook maar met sy kop omhoog loop.
Landboudal het ‘n oortuigende sege van 33-8 oor Fichardtpark op Landboupark net buite Jacobsdal behaal. Lanties en Fichies het vroeër vanjaar 19-elk gelykop gespeel. Vir die wenspan het die flank Haas Benadé, losskakel Louwtjie Steenkamp en flank Danie du Toit uitgeblink.
Duineveld het teen Waterkloof se tweede span 20-14 as oorwinnaars van die veld gestap. Die span se agtsteman Junior Burger en stut Jan-Hendrik van Wyk was aan die spits van die sege.
Hoërskool Upington het Woensdag teen die toerspan van Hoërskool Windhoek 24-elk gelykop gespeel.
Postmasburg het in die doodsnikke van sy ligawedstryd teen Douglas ‘n strafdoel reg voor die pale oorgeklits om ‘n naelskraapse sege van 17-16 te behaal.
Puntemakers:
Noord-Kaap 34 (10) – Drieë: Hillford Clarke (2), Dimitrio Tieties, Doctor Booysen, Leon Becker. Doelskoppe: Tieties (3). Strafdoel: Tieties. Waterkloof 30 (9) – Drieë: Xander van Wyk, JP Snyman, Jeandré Machau. Doelskoppe: Tinus de Beer (3). Strafdoele: De Beer (3).
Diamantveld 43 (22) – Drieë: Jacques Nel (2), Ronaldo Abrahams, Jacques van Zyl, Deon van Zyl, Christo Breytenbach. Doelskoppe: Deon van Zyl (5). Strafdoel: Van Zyl. Hoërskool Upington 17 (10) – Drieë: Jasper Wiese, Louw Scholtz, Elwin Steenkamp.Doelskop: DJ van den Heever.
Landboudal 33 – Drieë: Henoux Benadé, Adriaan Britz, Guillaume Oberholster, Morris Rossouw, JD Mans. Doelskoppe: Rossouw (4). Fichardtpark 8.
Duineveld 20 (13) – Drieë: Ryno Nel, Jan-Hendrik van Wyk, Gideon Coetzee. Doelskop: Attie Brits. Strafdoel: Brits. Waterkloof II 14 (0).
Hoërskool Upington 24 – Drieë: Jasper Wiese, Gert Ruping, Roché Naudé, Sergio Boer. Doelskoppe: DJ van den Heever (2). Hoërskool Windhoek 24.
Douglas 16 – Drie: Nohan Visser. Doelskop: Morné Morolong. Strafdoele: Morolong (3). Postmasburg 17.
- Ntini the Chief Destroyer of Samoa at the ICC u19 Women’s World Cup - 2025-01-20
- DBE Matric Results | Per School 2024 - 2025-01-16
- IEB Matric Results | Per School 2024 - 2025-01-15
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
