Menlo spog met nuwe tartanbaan wat talle rekords in die slag laat bly

Geen van die Hoërskool Menlopark se interhuis-rekords op die baan is meer veilig nie.

Die Parkies wat met ‘n trotse atletiekrekord spog het vroeër vanjaar op 19 Januarie hulle eerste interhuis op hul spoggerige nuwe tartanbaan gehou.

Nie minder as 13 baanrekords het op dié byeenkoms in die slag gebly nie. ‘n Verdere sewe velditems spog ook met nuwe rekords.

Albei die 100m- en 400m-naellope vir meisies o.19 waarvan een rekord reeds sedert 1971 staan het in die slag gebly.

Menike van den Berg (o.19) het die 53 jaar oue rekord in die dogters 100m verbeter toe sy in 11.74 sekondes oor die eindstreep genael het. Dié vorige rekord het sedert 1971 agter die naam van Claudi van Straaten (11.80) gestaan.

Colleen Scheepers het ook in ‘n tyd van 11.79 sekondes kort op Van den Berg se hakke vinniger as Van Straaten se rekord oor die eindstreep genael. Dié rekord was amper net so oud soos die skool van die Jakarandastad wat in 1963 gestig is.

Scheepers het ook in ‘n blitsige 56.08 sekondes die 400m gewen om die rekord van Tihanna Vorster (56.70) uit die rekordboeke te vee. Vorster het haar rekord in 2003 opgestel.

Die hekkiesloper, Megan Nieman (o.15) het na vore getree as ‘n uitblinker wat die geskiedenis herskryf het met twee nuwe rekords.

Sy het Erasel Boer se rekord van 13.20 sekondes in 90 m-hekkies wat sedert 2020 staan met ‘n skitterende 12.43 sekondes oortref. Nieman het boonop die 300 m-hekkies oorheers en ‘n 12 jaar oue rekord van 45 sekondes wat deur Hestia Hanekom opgestel is, met ‘n blitsige 44.37 sekondes oortref.

Twee van Nieman se eie rekords het ook in die slag gebly. Sy het die rekord vir die 90m-hekkies vir meisies o.14 verlede jaar tot 13.60 sekondes verbeter. Janelle Kirkpatrick het die rekord tot 13.46 sekondes verbeter.

Die rekord vir 300m-hekkies (46.40) van Nieman is ook deur Kirkpatrick tot 45.71 sekondes verbeter.

Werner Bezuidenhout (o.19) het ook die nuwe baan ten volle benut en twee rekords in die slag laat bly.

Hy het in 10.46 sekondes hakskene vir sy teenstanders in die 100m vir seuns gewys. Dit het dié rekord (10.50) wat deur Rivaldo Roberts (1981) en Johan van Vuuren (2014) gedeel is, verbeter.

Bezuidenhout het ook in die 110m-hekkies met ‘n wentyd van 13.84 sekondes die rekord van 14.20 verpletter. Dié vorige rekord het sedert 2019 aan Michael Schoeman behoort.

Kaiden Beukes (o.14) het gewys dat hy in die toekoms nog goud werd vir sy skool kan wees. Hy het die 100m vir seuns in 11.64 sekondes gewen. Dit het die vorige rekord van 11.70 deur Leon Pretorius (2012) na 12 jaar uit die rekordboeke gevee.

Danie Bothma (o.15) het ook een van die ouer rekords van dié byeenkoms in die slag laat bly. Die rekord vir die 400m vir seuns o. 15 het sedert 1976 agter die naam van Werner Stals (51.90) gestaan. Dié rekord pryk nou op ‘n haastige 51.72 sekondes agter Bothma asook Llewellyn van Heerden se name.

Hou maar vanjaar ook weer vir Alicia Khunou dop. Sy behoort weer nie haar gelyke in die worpe vir meisies o.19 te hê nie.

Khunou het haar suster Lesedi se rekord in die diskus van 46 meter met ‘n uitmuntende poging van 50.93 meter uit die rekordboeke gevee. Lesedi Khunou het die rekord in 2022 opgestel.

Alicia het ook die gewigstoot-rekord met ‘n poging van 14.74m agter haar naam geskryf. Die vorige rekord (14.23) het sedert 2020 agter die naam van Bodine Degli-Umberti gestaan.

Chirsté Loedolff het self vir opwinding gesorg deur Alicia Khunou se o.17-diskusrekord met ‘n poging van 45.61m te oortref. Khunou het die rekord verlede jaar met ‘n gooi van 45.27m opgestel.

Aiden Erasmus (o.17) het die diskusrekord van Lohan Potgieter (53.14m) tot 54.89m verbeter. Potgieter het in 2018 tydens die Afrika Jeugspele die silwermedalje in die gewigstoot verower. Hy het sedertdien vir die Cheetahs op die rugbyveld sy buiging gemaak. Potgieter se diskusrekord is ook in 2018 opgestel.

Jaco van Dyk (o.14) het die gewigstoot vir seuns se rekord tot 16.81m gerek. Dié rekord het voorheen agter die naam van Liam Pavier (16.66m) gestaan. Pavier was in 2019 asook in 2020 die Nieu-Seelandse skolekampioen in dié nommer.

Menlopark wat bekend is vir sy uitstekende atletiekprogram het met die tartanbaan ‘n reuse tree gegee om dié sport ná ‘n nog hoër vlak by die skool te neem.

Vir jare was ‘n tartanbaan ‘n groot droom vir dié skool en in Julie 2023 het die skool ‘n “Groet die Gras-seremonie” gehou waar die hele skool vir oulaas om die grasbaan gehardloop het.

Bouwerk het voluit op 1 Augustus afgeskop en die gras moes plek maak vir die tartan.

Daar is effektief gewerk en op 8 Desember was die tartan gereed vir die merk van die bane. Teen 20 Desember is die bane finaal gemerk en was gereed vir die begin van die nuwe skooljaar.

Dié tartanbaan is slegs die vierde in Suid-Afrika wat deur ‘n skool gebou is. Die oudste tartanbaan by ‘n skool is reeds in 1978 deur die Hoërskool Hans Strijdom in Naboomspruit (deesdae Mookghopong) in gebruik geneem. Noordheuwel van Krugersdorp en Queen’s College in Queenstown is die ander skole wat met hul eie tartanbane kan spog.

Queen’s College se baan is verlede jaar in gebruik geneem.