Jong Bokkies struikel oor laaste hekkie
Die Jong Bokkies het met ‘n enkele punt oor die laaste hekkie op die Junior Wêreldbeker-toernooi op Edenpark in Auckland teen Engeland gestruikel. Die Engelse o.20-span het met hulle sege van 21-20 in die senutergende eindstryd slegs die tweede span in die geskiedenis van die toernooi geword om sy titel suksesvol te verdedig.
Daar is vooraf verwag dat die Suid-Afrikaners se plaasvervangersbank dalk vir die span die knoop sou deurhaak. Dit was egter die Engelse plaasvervanger kantman, Joel Conlon, wat na ‘n rolmaalbeweging van ‘n lynstaan af vir Engeland gaan druk het, wat van die plaasvervangersbank die grootste invloed op die wedstryd gehad het. Conlon se drie het die Engelse met agt punte laat voorloop na rustyd met die telling op 21-13.
Die Jong Bokkies se plaasvervangers, die vleuel Duhan van der Merwe en stut Pierre Schoeman, het wel ‘n positiewe invloed gehad met hulle verskyning op die veld. Die Suid-Afrikaners se senter, Jesse Kriel, het twee puik drieë gedruk waarvan sy tweede sy span weer in die wedstryd gebring het.
Kriel se eerste drie het gekom na ‘n perfekte steekskoppie deur sy kaptein en losskakel, Handré Pollard. Die kaptein het met sy taktiese skopwerk beïndruk in die eindstryd. Hy het met twee skepskop-pogings misluk, maar was ook een van sy span se staatmakers.
Die Engelse gevaarman, Nathan Earle, het sy sesde drie van dié toernooi net voor rustyd gedruk nadat die senter Nick Thompkins vir Kriel en André Esterhuizen op die verdediging ontbloot het. Earle het tot voor en ná die drie die Suid-Afrikaners nie veel probleme besorg nie. Die kampioen het danksy dié drie met die omdraaislag ‘n voorsprong van 11-10 geniet.
Die Engelse se heelagter, Aaron Morris, het kort voor Earle se drie die eerste sielkundige hou toegedien toe hy met ‘n reuse strafdoel van binne sy eie halfgebied geslaag het.
Daar was niemand beter vir die Jong Bokkies as die slot, JD Schickerling, nie. Hy het in die eerste helfte drie keer die Engelse se balbesit by lynstane afgeneem. Sy rankwerk het ook waarskynlik die Engelse haker, Tom Woolstencroft, gedwing om ‘n paar van sy ingooie skeef te trek.
Die Jong Bokkies sal wel as slegs die tweede span in die geskiedenis na Suid-Afrika terugkeer wat daarin kon slaag om ‘n Nieu-Seelandse nasionale rugbyspan twee keer agtereenvolgens op sy eie agterplaas te klop.
Dié ander span, die Springbokke van Phillip Nel in 1937 word vandag steeds as die beste Springbok-toerspan wat Suid-Afrika ooit verlaat het beskou. Nel se span het die All Blacks met 17-6 en 13-6 in die eerste twee toetse in ‘n reeks van drie toetse verslaan.
Puntemakers:
Engeland 21 (11) – Drieë: Joel Conlon, Nathan Earle. Doelskop: Billy Burns. Strafdoele: Burns (3). Suid-Afrika 20 (10) – Drieë: Jesse Kriel (2). Doelskoppe: Handré Pollard (2). Strafdoele: Pollard (2).
