Jansies breek Klofies se harte in tweede helfte, terwyl Helpies die Rhinos blitzkrieg
PRETORIA. – Dit was ‘n opwindende wedstryd vir die toeskouers, maar vir die afrigters van Dr. EG Jansen en Waterkloof sou dit ‘n hele paar gryshare besorg het.
EG Jansen het vir Klofies met 31-26 geklop in ‘n kragmeting van twee helftes in die twee spanne se SDC Noordvaal Cup kragmeting in die Beker-afdeling.
Kyk weer na al die aksie op SuperSport Schools (www.supersportschools.com).
Die Klofies het teen rustyd ‘n stewige voorsprong van 19-0 opgebou en boonop kort na rustyd die voorsprong tot 26-0 gerek met ‘n bonuspunt vir vier drieë reeds in die sakkie.
Drie geelkaarte waarvan een kort voor rustyd aan onderskeidelik Reuven Ferreira (binnesenter), Jean Jooste (flank) en Dylan Knoete (slot) deur die skeidsregter, Niel Bosman, het ook ‘n bydrae gehad om die momentum van die kragmeting in die guns van die Jansies te swaai.
Jansies se vleuel Cameron van Wyk was weer op sy stukke en is vir sy vertoning as Speler van die Wedstryd aangewys. Van Wyk het twee keer ‘n draai agter die doellyn gaan maak. Die plaasvervanger-vleuel, Matthew Bergman, het self met sy spel gehelp om die wedstryd in sy span se guns te beklink.
Voorlangs het Reon van Aswegen (flank) en Marnus Swarts (vaskopstut) blink vertonings vir die wenspan gelewer.
Klofies se hoofafrigter, Cobus van Dyk, sou waarskynlik al sy hare uit sy kop wou trek indien hy gehad het en sal vandag steeds wonder wat fout in die tweede helfte gegaan het. Hierdie nederlaag sou gewis Klofies se kanse om die uitspeelrondes te haal ‘n gevoelige knou toegedien het.
Die Klofies se loskopstut, Marnus Maritz, het ‘n uitstekende wedstryd beleef. Hy het met sy kraglopies sy span op die voorvoet gehou. Die span se flank Jooste asook die kaptein en agtsteman, Dale Arlow, het ook weer meer as hul kant gebring.
Helpmekaar-kollege was al op die veld toe die Hoërskool Nelspruit se Rhinos se gedagtes nog in die kleedkamer was. Helpies se regtervleuel, Delano Maritz, het na slegs sewe sekondes vanaf die afskop gaan druk om duidelik te weer te gee dat sy span daar was met ‘n doel.
Helpies het teen rustyd ‘n stewige voorsprong van 22-0 opgebou. Die Rhinos het in die tweede helfte terug geveg, maar dit was ongelukkig nie genoeg nie. Die tuisspan se haker, Regard Vermaak, asook die binnesenter, Heino Meiring, het moedig probeer.
Vir die Helpies was sy loskopstut, Boela de Wet, asook die slot Ulrich Swart uitstaande.
Garsfontein het ondanks heelwat skuiwe aan sy span weens beserings en siekte steeds nie veel probleme ondervind om vir Marais Viljoen van Alberton met 64-12 op Berepark in Pretoria kaf te draf nie. Die Bere het teen rustyd ‘n voorsprong van 26-7 geniet.
Die flank Luan Olivier moes op binnesenter begin en het sy vryheid in die middelveld met twee drieë gevier. Die span se drieëvraat Ruan Enslin (vleuel) het self twee keer gaan afrond. Buiten die twee het die skakelpaar, Zian Cilliers en Brooklyn Newman, ook goed vertoon.
Newman het weer op losskakel begin, terwyl die gereelde losskakel, Nicallen Gabrielsen, op die krukkelys is. Cilliers wat in Gabrielsen se afwesigheid die stelskopwerk hanteer het sewe van sy span se tien drieë verdoel.
Vir Marais Viljoen kan Jeandre Theron (binnesenter) en Dian Scheepers (slot) kan hul koppe vandag na hul vertonings omhoog hou.
Noordheuwel se JT Kapank was weer op sy stukke en het ‘n allemintige 28 punte met sy skopskoen in sy span se oorwinning van 73-12 oor Menlopark aangeteken. Kapank het vyf van sy span se nege drieë verdoel en ook met ses strafdoele geslaag.
Nories was teen rustyd met die telling op 38-5 reeds stewig in die saal. Die span se vleuel Keaton van Deventer het ‘n driekuns aan drieë voltooi, terwyl die gevaarlikse heelagter, Cheswill Jooste, self twee keer gaan druk het.
Puntemakers:
EG Jansen 31 (0) – Drieë: Cameron van Wyk (2), Matthew Bergman, R-Jay Petersen, Strafdrie. Doelskoppe: David Twala (2). Waterkloof 26 (19) – Drieë: Stephan Jacobsz (2), Happy Makate, Hernus Marais, Sjaan Steyn. Doelskoppe: Marais (3).
Helpmekaar 39 (22) – Drieë: Delano Maritz, Ulrich Swart, Ulrich van der Merwe, Zack Smit, Molatso Moloi, Jandre Labushagne. Doelskoppe: Michael Benzien (3). Strafdoel: Benzien. Hoërskool Nelspruit 12 (0) – Drieë: Ian Wood, Regard Vermaak. Doelskop: Theuns Meyer.
Noordheuwel 73 (38) – Drieë: Keaton van Deventer (3), Cheswill Jooste (2), Rudolf Coetzee, Jade Muller, Coun-Lee Koekman, Jenemo Luiters. Doelskoppe: JT Kapank (5). Strafdoele: Kapank (6). Menlopark 12 (5) – Drieë: Wynand van Wyk, Mocke Balt. Doelskop: Jayden Fortuin.
Garsfontein 64 (26) – Drieë: Ruan Enslin (2), Luan Olivier (2), De Wet Lottering, Leighton-Jon Cloete, Zian Cilliers, Cassie Prinsloo, Dimitre Erasmus, Jason Hugo. Doelskoppe: Cilliers (7). Marais Viljoen 12 (7) – Drieë: Jeandre Theron, Brandon Els. Doelskop: Rekkie Gerber.
Ander spanne:
o.16: Waterkloof 36, EG Jansen 6; Noordheuwel 19, Menlopark 18; Marais Viljoen 28, Garsfontein 12; Helpmekaar 24, Nelspruit 20.
o.15: Waterkloof 21, EG Jansen 10; Noordheuwel 15, Menlopark 10; Garsfontein 66, Marais Viljoen 13; Helpmekaar 29, Nelspruit 3.
o.14: EG Jansen 24, Waterkloof 8; Noordheuwel 24, Menlopark 8; Garsfontein 69, Marais Viljoen 0; Nelspruit 21, Helpmekaar 0.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
