Interskole: Chillies seëvier weer – vir die 17de keer!

Hulle naam is nie verniet die Chillies nie, want hulle is vir seker warm.

Hoërskool Duineveld se eerste netbalspan is die afgelope 17 onoorwonne tydens Interskole en het vanjaar weer gewys hoekom hulle deurgaans die voorste netbalspan in die Noord-Kaap is.

Die Chillies het Saterdag hul vernuf tentoongestel deur vir Hoërskool Upington met 44-34 op hul tuisveld te verslaan. Hierdie oorwinning onderstreep ‘n absoluut ongelooflike segetog.

Dit was nie die eerste keer dat dié twee spanne vanjaar slaags geraak het nie. Hulle het drie keer ontmoet in 2024, met die Chillies wat twee keer as oorwinnaars uit die stryd getree het om hul oorheersing en veerkragtigheid verder te beklemtoon.

Abriëlle de Witt en Carmi Liebenberg was uitstaande tydens die onlangse kragmeting. Carmi het  elke keer wat sy die bal gekry het punte op die telbord gesit, terwyl Abriëlle die bal behendig na die doel gedra en aansienlik tot hul triomf bygedra het.

Madre Steyn, afrigter van die Chillies, was uiteraard in haar noppies met die sege: “Dit was ‘n fantastiese seisoen en om op hierdie hoogtepunt te eindig is ‘n toonbeeld van die harde werk en toewyding van die span.”