Immelman voorste speler op Fichies se sportdag
DIE jaarlikse sportdag van die Hoërskool Fichardtpark in Bloemfontein het Saterdag sy tienerwording gevier. Die sportdag groei jaarliks en is sonder twyfel getalle gewys reeds ‘n geruime tyd die grootste sportdag van sy soort in Suid-Afrika.
Nie minder as 29 skole se eerstespanne was op die sportdag in aksie nie. Dit is ook al die afgelope twee jaar nie vreemd dat van die voorste talentjagters in die land reeds spelers se vertonings hier dophou nie. Die Vrystaat se André Tredoux, Blou Bulle se Werner de Beer en die direkteur van rugby by Durban Harlequins Francois Schoeman was almal te sien by die dag. Verskeie agente het ook van die wedstryde bygewoon om moontlike kliente se spel dop te hou.
School of Rugby se Hannes Nienaber het die dag bygewoon en die wedstryde op die A-veld dopgehou. Hier is sy vyf spelers wat die beste vertonings op die dag gelewer het en indrukke:
Die beste speler van die dag was ongetwyfeld Grey-kollege se heelagter, Henry Immelman. Hy het drie drieë in sy span se gemaklike sege van 53-0 oor Potchefstroom Gimnasium gedruk.
Immelman het daardie rustigheid wat ‘n goeie heelagter in hom moet hê. Dit het nooit tydens die wedstryd gelyk asof hy onder druk is nie. Grey se heelagter van verlede jaar EW Viljoen was een van die skolespelers wie se naam die meeste deur gebruikers van die internet in soektogte ingetik is. Buiten Viljoen het bekende spelers soos Gerbrand Grobler, Pieter Muller, Michael Horak, Joe Pietersen, Frans Steyn en Riaan Britz vir Grey die nommer 15-trui oor die kop getrek. Immelman behoort indien hy op sy spelpeil voortbou in die toekoms in dieselfde asem as die voorgangers genoem te word.
Indien ‘n skrumskakel vanjaar die Suid-Afrikaanse Skole-span wil haal, sal hy eers verby Hentie Cilliers se Jaywinn Juries moet kom. Hoewel Juries se span teen Sentraal 23-25 die knie gebuig het, het die skrumskakel met sy suiwer aangeewerk beindruk. Hy het ook heelwat spiermassa gebou sedert verlede jaar. Juries het verlede jaar se Cravenweek in Polokwane weens ‘n gebreekte gewrig misgeloop. Hy was twee jaar gelede in die nasionale o.16-oefengroep.
Nog ‘n speler wat in 2012 die nasionale groep gemaak het, was die slot van Sentraal SJ Wessels. Hy het teen Hentie Cilliers een van die beste voorspeler drieë van die dag gedruk. Wessels was ongetwyfeld die speler van die wedstryd in Tralies se sege.
Grey se agtsteman, Alex Jonker het voorlangs sy span op die voorvoet gehou. Hy het die bal goed gedra en ook op die verdediging uitgestaan. Jonker was ook twee jaar gelede saam met Juries en Wessels in die nasionale o.16-oefengroep.
Hy behoort vanjaar nog vele uitstaande vertonings vir sy skoolspan op te dis. Hy het twee van sy span se drieë gedruk en ook met sy posisionele spel beindruk.
Sentraal se losskakel DP de Lange was ‘n ware generaal in sy span se oorwinning oor Hentie Cilliers. De Lange was ook in 2012 ‘n lid van die nasionale o.16-oefengroep. Hy behoort egter ‘n taaier teenstand vir ‘n plek in die Vrystaatse Cravenweek-span te verwag as Jonker en Wessels. Grey se losskakel Dwayne Wessels het self ‘n goeie vertoning teen Potchefstroom Gimnasium gelewer. De Lange is Saterdag in sy span se interskole teen Hoerskool Waterkloof van Pretoria teen Tinus de Beer in ‘n fynproewers-stryd betrokke
