Hentie Cilliers die kampioen van die Griffons
DIE eerste rugbyspan van Hentie Cilliers van Virginia het sy titel as Griffon-kampioen behou deur oor die Hoërskool Voortrekker van Bethlehem 22-10 in die eindstryd van dié liga op die Noordwes-stadion in Welkom koning te kraai.
Dit was die eerste keer ooit dat die span van Bethlehem in die eindstryd van die Griffon-liga aan die verloorkant was. Die span se losskakel, Tokkie van Zyl het 14 punte na die pale toe verbrou. Dit het die span deur te staan gekom.
Die Trekkers sal nou na Kimberley moet reis om teen die verdedigende kampioen van die Kovsiestreek-kompetisie se Shimla-liga (vir mediumskole), die Hoërskool Noord-Kaap in die halfeindstryd van dié liga te pak.
Hentie Cilliers moet na Bloemfontein reis waar hulle teen die Vrystaatse kampioen, Louis Botha in die ander halfeindstryd sake sal uitspook.
Dit was die eerste keer sedert 2010 wat die span van Virginia daarin kon slaag om sy teenstanders van die Oos-Vrystaat ore aan te sit.
Die span se agtsteman, Gregan Hull is moeililk grond toe gebring. Hy was weer soos in al sy span se kragmetings tydens die liga ‘n staatmaker gewees. Henties se kaptein en slot Brandon Kuzatjike het ‘n groot aantal duikslae uitgevoer. Agterlangs was die senter Rian Pretorius se verdediging rotsvas, terwyl die skrumskakel Jaywin Juries die spel met sy besluitneming dikteer het. Hy het vinnige diens aan sy losskakel Sylvester Lewis verskaf.
In die Volksblad-liga (vir o.15-spanne) sal daar eers vandag na ‘n vergadering besluit word wie die Vrystaat in die streekkompetisie sal verteenwoordig. Fichardtpark en Sentraal het 19-elk gelykop in die eindstryd van die Vrystaatse liga gespeel.
Die grondwet van die Vrystaat Hoërskole-rugbyvereniging het nie ‘n bepaling wie in so geval deurdring nie. Fichies behoort die Vrystaat te verteenwoordig indien daar besluit word dat die span wat bo-aan die liga geëindig het, tot die streekkompetisie sal deurdring.
Dié span sal teen Voortrekker van Bethlehem in die halfeindstryd van die Volksblad-liga te staan kom. Die Trekkers moes hard werk om die Afrikaanse Hoërskool Kroonstad 12-7 in die eindstryd van die Griffon-liga te klop. Rooiskool sal in die ander halfeindstryd van die streekkompetisie teen Noord-Kaap te staan kom.
In die Vrystaatse o.14-liga het Fichardtpark en Sentraal 12-elk gelykop in die eindstryd gespeel. In die Griffon-liga het Rooiskool se tweede span teen Voortrekker 8-10 tweede gekom.
In die o.14-eindstryd was Witteberg in ‘n taai eindstryd teen Welkom-Gimnasium 26-24 baas. Die twee spanne was met die omdraaislag gelykop met die telling op 19-elk.
Puntemakers:
Hentie Cilliers 22 (14) – Drieë: Jamie Joseph, Jonathan April, Jaywin Juries. Doelskoppe: Ethan Williams (2). Strafdoel: Juries. Voortrekker 10 (5).
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
