SuperSport Schools Plus

Grey-kollege klop Maritzburg-kollege in Rosestad

By Hannes Nienaber , in Rugby | News , at 2014-08-17

Grey-kollege se eerste rugbyspan het te veel skietgoed vir Maritzburg-kollege in die twee spanne se eerste ontmoeting sedert 2008 gehad. Die span van die Rosestad het op sy tuisveld gemaklik met 46-20 die pyp gerook.

Die besluit deur Grey se afrigter, Wessel du Plessis, om sy drie stutte Callie Janse van Vuuren, Janu Botha en Ruben Terblanché saam in die voorry in te span het vrugte afgewerp. Die wenspan het die skrums oorheers en die insluiting van die meer fisieke Ruben Schoeman op slot het die enjinkamer ook meer krag gegee. Schoeman het ook met die bal in die hand ‘n hele paar keer oor die voordeellyn gekom.

Die flank, Henry Slabbert, is na afloop van die wedstryd welverdiend as speler van die wedstryd aangewys. Hy het by die afbreekpunte probleme vir die besoekers besorg. Hy het ook op verdediging ‘n paar manne hard gelak, terwyl daar ook met sy ingooiwerk in die lynstane nie fout gevind kon word nie.

Die heelagter, Henry Immelman, het ‘n hele paar keer goed aansluiting by sy agterlyn gevind. Met die bal in die hand het hy telkemale verdedigers na lug laat gryp. Die vleuel, Jacques Roberts, het met sy vaart beindruk. Hy het op ‘n keer met ‘n breekslag vanuit sy eie gebied vir ‘n hele paar verdedigers van Maritzburg-kollege hakskene gewys.

Grey se vermoë om die bal lewendig te hou wanneer hulle op die aanval is het die besoekers die meeste probleme besorg.

Vir die span van Pietermaritzburg het sy heelagter, Matthew Kriel, ‘n uitstaande vertoning gelewer. Hy het elke keer wanneer hy aanvalle vanuit die laaste vesting geloots het ‘n hele paar verdediger na lug laat gryp.

Die eerstespan van Hoërskool De Aar was te sterk vir Hoërskool Vaalharts in die eindstryd van Griekwaland-Wes se A-liga vir kleinskole. Die span uit die Conroy-streek het die Brode met 50-0 verslaan.

Puntemakers: 

Grey-kollege 46 (18) – Drieë: Callie Janse van Vuuren (2), Tabu Maree, Jacques Grobler, Henry Slabbert, Henry Immelman. Doelskoppe: Julian Jordaan (5). Strafdoele: Jordaan (2). Maritzburg-kollege 20 (3) – Drie: Masikane Mazwi, Daryn Goodson, Renard le Roux. Doelskop: Marcell Coetsee. Strafdoel: Coetsee.

De Aar 50 – Drieë: Jacques Beukes (2), Didi Fourie, Gordon Ramaisa, Gloucester Hugo, Justin Pietersen, Strafdrie. Doelskoppe: Wickus Strauss (6). Strafdoel: Strauss. Vaalharts 0.

Hannes Nienaber