Eldoraigne verras teen Kempies
Al vier die Blou Bulle se Makroskole wat vir die Beeld Noordvaal Trofee gekwalifiseer het, sal in die kwarteindronde van die reeks in aksie wees.
Eldoraigne het op sy tuisveld in Pretoria vir die grootste verrassing gesorg toe hy vir Kempton Park in hulle uitspeelwedstryd met 20-14 die loef afgesteek het. Dit was ‘n klipharde stryd waarin die uitslag enige kan toe kon gaan. Die tuisspan het net beter afgerond, wat aan hom die sege besorg het.
Menlopark was in ‘n wipplankstryd teen Marais Viljoen met 37-30 baas. Die span van die Jakarandastad se SA Skole-heelagter, Andell Loubser, was op sy stukke. Hy het 22 van sy span se punte aangeteken wat twee drieë ingesluit het. Hy sal egter nie weens sy verpligtinge by die nasionale skolespan vir sy skoolspan se kwarteindstryd teen HTS Middelburg beskikbaar wees nie.
Helpmekaar-kollege het vroeg in die tweede helfte na ‘n hoër rat oorgeskakel om Hugenote van Springs met 34-18 in ‘n uitspeelwedstryd vir Grootskole in die Beeld Noordvaal Trofee te klop. Hugenote het vir Helpies probleme in die eerste helfte besorg en veral die losskakel, Lenus Wilkinson, se skopskoen was ‘n doring in hulle vlees.
Helpies se vleuel Mel Mathieson en losskakel, Justin Taylor, het skitterend vir die wenspan vertoon. Potchefstroom-Gimnasium, die Hoërskool Klerksdorp en Ben Vorster Tzaneen het ook met seges hulle plek in die kwarteindronde van die reeks bespreek.
Die drieevraat, Xolisa Guma, het op die beste moontlike wyse vir die Suid-Afrikaanse Skole-keurders tong uitgesteek. Hy het ‘n driekuns aan driee in sy skoolspan, Maritzburg College, se oortuigende sege van 55-6 oor Pretoria Boys’ High behaal.
In Bloemfontein het Grey-kollege sy onoorwonne status op sy tuisveld teen Grey PE behou deur met die telling op 34-22 as oorwinnaars van die veld te stap. Die span se haastige vleuel, Johan van der Walt, het twee keer in vyf minute gaan druk om die sege te beklink.
Welkom-Gimnasium het op alle silinders in sy ENB Classic Clash teen Goudveld-Hoërskool gevuur om oortuigend met 66-6 te wen. Gimmies het 13 spelers tot die Griffons se Cravenweek-span bygedra, terwyl Gouties nie een speler in die span gehad het nie.
Die wenspan het ook hiermee die rondomtalie-afdeling van die Griffon-liga onoorwonne afgesluit. Die span gaan nie maklik uit vanjaar se Kovsiestreek-kompetisie se Shimla-liga (vir mediumskole) gehou word nie.
Hoërskool Kroonstad se groep seuns wat drie jaar terug reeds in die diepkant ingegooi is, het hulle skolerugby-loopbane heel gepas vir hulle diens gelewer op ‘n hoë noot afgesluit. Blouskool was met 43-3 oor HTS Welkom baas.
Wilgerivier van Frankfort het Harrismith se hart gebreek deur met 20-12 in die eindstryd van die Oos-Vrystaat koning te kraai. Harrismith was laas in 1988 kampioen van die Riemland, terwyl Wilgerivier nou vyf titels op ‘n streep verower het.
Bothaville het ook die bordjies teen Hennenman in die eindstryd van die Sandveld-liga met ‘n sege van 24-6 verhang. Die kampioen het in albei sy kragmetings vroeër vanjaar teen Hennenman die knie gebuig.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
