Du Toit skop Valia tot sege oor Klerksdorp, terwyl Kempies feesvier in Middelburg
Die eerste skote in vanjaar se Plaat-kompetisie van die SDC Noordvaal Cup het geklap en dis duidelik dat hierdie liga weer een van die taaistes in die reeks sal wees.
Transvalia se losskakel, Duan du Toit, het met sy akkurate skopskoen seker gemaak dat sy span hul aanslag op vanjaar se titel met ‘n sege van 43-17 oor die Hoërskool Klerksdorp afskop.
Du Toit het ‘n persoonlike bydrae van 23 punte met sy skopskoen tot die sege gelewer. Hy het vyf strafdoele deur die pale gejaag en ook met vier doelskoppe geslaag.
Die span van Vanderbijlpark het ook onlangs terug in sy midde vir Kyle Esterhuizen (vleuel) en Junior van Wyngaardt (haker) terug verwelkom. Albei het ‘n draai by Monument in Krugersdorp gemaak, voordat hulle besluit het om huiswaarts te keer.
Van Wyngaardt het Saterdag twee keer agter Klerksdorp se doellyn gaan kuier.
Klerksdorp se losskakel, Leonard Bevan, het self nie teruggestaan nie. Hy het vier strafdoele oorgeskop om die telbord vir sy span aan die rol te hou.
Die Hoërskool Kempton Park sal baie tevrede wees met sy sege van 32-25 oor HTS Middelburg om sy aanslag in die reeks mee af te skop. Dit is nooit maklik vir enige span om ‘n sege in Middelburg te behaal nie.
Die Rooi Bulle het teen omdraaislag ‘n voorsprong van 15-10 geniet. Kempies se losskakel, Zander de Jongh, asook die buitesenter, Tian Aucamp, het dubbelle driedrukplesier ervaar om hul span tot ‘n oorwinning te help.
Die heelagter, Josh Meyer, was ook uitmuntend in die laaste vesting vir die wenspan. Voorlangs het die agtsteman, Divan Francis, asook die flank Divan Bouwer ook goeie vertonings opgedis.
Puntemakers:
Transvalia 43 (27) – Drieë: Junior van Wyngaardt (2), Brandon-Lee Smit (2), Daniel Grobler. Doelskoppe: Duan du Toit (4). Strafdoele: Du Toit (5). Hoërskool Klerksdorp 17 (11) – Drie: HJ Erasmus. Strafdoele: Leonard Bevan (4).
Kempton Park 32 (10) – Drieë: Zander de Jongh (2), Tian Aucamp (2), Brandon Grobler. Doelskoppe: Tiaan Delport (2). Strafdoel: Delport. HTS Middelburg 25 (15) – Drieë: Hanco Nel, Desmond Milner, Senatla Seabela. Doelskoppe: Jacque Stassen (2). Strafdoele: Stassen (2).
Ander spanne:
o.16: Transvalia 26, Klerksdorp 17; HTS Middelburg 21, Kempton Park 5.
o.15: Transvalia 50, Klerksdorp 5; Kempton Park 29, HTS Middelburg 5.
o.14: Transvalia 13, Klerksdorp 12; Kempton Park 34, HTS Middelburg 3.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
