De Beer sal beskikbaar vir eerste SA Skole-wedstryd wees
Die Suid-Afrikaanse Skole-losskakel Tinus de Beer is in ’n tugverhoor vrygespreek nadat hy tydens Waterkloof se Beeldtrofee-uitspeelwedstryd teen Kempton Park ’n rooikaart ontvang het.
As hy skuldig bevind is, sou hy outomaties vir ’n wedstryd geskors gewees het. Klofies het die uitspeelwedstryd met 22-20 verloor en De Beer se volgende wedstryd sou dus die nasionale skolespan se kragmeting teen Frankryk op 15 Augustus in Kaapstad gewees het.
De Beer het twee keer ’n geelkaart gekry omdat hy Kempies se losgemale glo onwettig gestuit het. De Beer is in die sesde minuut van die kragmeting die eerste keer koelkas toe gestuur. Ná slegs drie minute in die tweede helfte het hy sy tweede geelkaart ontvang, wat beteken dat hy met ’n rooikaart van die veld gejaag is. Hy was tydens die Cravenweek in Middelburg (Mpumalanga) die akkuraatste stelskopper en sy afwesigheid op die veld het sy span gewis gekos.
In die Groot-skole uitspeelwedstryd tussen Frikkie Meyer van Thabazimbi en Hugenote van Springs het laasgenoemde se stut André Janse van Rensburg ’n rooikaart gekry nadat hy die tuisspan se agtsteman, Hendrik du Plessis, met die vuis bygedam het.
Du Plessis was bewusteloos ná die hou en is Maandag uit die Medihelp-kliniek in Thabazimbi ontslaan. Hy was een van die Limpopo Blou Bulle se staatmakers tydens die Cravenweek.
Janse van Rensburg het gereageer nadat Du Plessis hom met die elmboog op die keel getref het. Hy sal Hugenote se kwarteindstryd môre 10:00 teen Hoërskool Standerton misloop.
Die ander rooikaart tussen die uitspeelwedstryde is aan Florida se kantman, Willie Bronkhorst, in sy span se nederlaag van 25-17 teen Centurion gewys. Bronkhorst het ook gereageer nadat Woeries se agtsteman, Cornel Jacobs, eerste op hom ’n hou ingekry het. Jacobs moes self na die voorval tien minute in die koelkas spandeer.
Die Beeldtrofee se onderskeie afdelings se kwarteindstryde vind more plaas. Die verdedigende kampioen van die Makro-skole, EG Jansen, sê op sy tuisveld in Boksburg vir Menlopark die stryd om 12:15 aan. Kempton Park pak Hoërskool Nelspruit se Rhinos om 10:15 op sy tuisveld.
Monument moet na Middelburg reis waar HTS Middelburg om 10:15 op hom wag. Die ander Makro-skole kwarteindstryd word tussen Garsfontein en Centurion om 11:00 op eersgenoemde se tuisveld beslis.
) Pennypinchers en Timbercity is medeborge van dié reeks.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
