Brandfort vir die eerste keer op sportdag verslaan
‘n TROTSE rekord het Saterdag op Pagepark in Brandfort in die slag gebly. Die gasheer van die jaarlikse sportdag hier, die Hoërskool Staatspresident Swart is vir die eerste keer in die 15 jarige bestaan van dié dag verslaan.
En dit het ‘n kliniese vertoning van Hoërskool Bothaville gekos om die kragmeting 29-14 te wen en sodoende ‘n uitsonderlike rekord in die slag te laat bly. Bothaville het feitlik al die balbesit sowel as die gebiedsvoordeel in die kragmeting geniet. Die tuisspan het egter verwoed verdedig en rustyd slegs 7-15 agtergeloop ondanks ‘n reuse aanslag deur Bothaville op sy doellyn. Brandfort het slegs een keer balbesit in Bothaville se helfte geniet en toe het sy flank Ernst Victor gaan druk, na goeie samespel deur die senter Vlam Groenewald en Henco de Wet.
Vir Bothaville het sy kaptein en agtsteman Sakkie Bester en losskakel WJ Crous uitstaande vertonings gelewer. Hoewel Crous ‘n geelkaart vir ‘n ontoelaatbare duikslag ontvang het, het hy ook twee van sy span se drieë gedruk en drie doelskoppe oorgeklits. Brandfort se lynstaanwerk en skrumwerk was sy grootste swakpunte.
Grey-kollege se XV-tal, die skool se waarskynlike eerstespan sonder krieketspelers en atlete, het nie veel meer as skadu-rugby teen Goudveld-Hoërskool gespeel nie. Die span van Grey het Goudveld in 35 minute 111-0 verneder. Die eerste helfte was slegs 22 minute lank, terwyl die tweede helfte net 13 minute lank was. Die skeidsregter, Sakkie Meyer het slegs sy fluitjie vir die 18 drieë, agt doelskoppe, die twee afskoppe en vir die sewe skrums van die wedstryd geblaas. Hy het nie een strafskop toegeken nie.
Hoewel dié nie Goudveld se eerstespan was nie, het die program van die dag daarmee verskil. Gouties se eerstespan het ‘n kamp die naweek gehad, dit was dus ‘n tweede span. Daar is baie ander skole wat baie sou doen vir ‘n geleentheid om hul trots teen die land se voorste rugbyskool te meet, die span van Welkom het sy geleentheid en waarskynlik toekomstige geleenthede verspeel.
Grey se Barbarians het veel taaier teenstand van Gouties se aartsvyand, Welkom-Gimnasium ontvang. Die Barbarians het 26-16 as oorwinnaars van die veld gestap danksy skitterspel deur Julian Jordaan. Jordaan het die kragmeting as skrumskakel begin en toe hy as binnesenter weer op die veld kom het hy eers die aanvoorwerk vir die vleuel Godfrey Simelane se tweede drie gedoen en dié verdoel om sy span 17-16 te laat voorloop. Hy het daarna weer soos ‘n warm mes deur botter deur Gimmies se verdediging geglip om self te gaan druk. Gimmies moes vir lank met 14 spelers klaarkom omdat twee spelers Nazo Nkala en Ediaan Badenhorst wat koelkas toe gestuur is. Vir Gimmies was sys enter Danie Hendriks ‘n yster op verdediging.
Hentie Cilliers se tweede span het President Steyn 40-5 die loef afgesteek.
Puntemakers:
Bothaville 29 (15) – Drieë: WJ Crous (2), Sakkie Bester, Armand van Wyk. Doelskoppe: Crous (3). Penalty: Derick Beeslaar. Brandfort 14 (7) – Drieë: Ernst Victor, Pieter Reynecke. Doelskoppe: Henco de Wet (2).
Grey-kollege XV-tal 111 (76) – Drieë: Charl Pretorius (4), Niel Stannard (3), Henry Slabbert (2), Glen Erickson (2), Dwayne Wessels (2), Marius Kruger, CJ Lötter, Louwtjie Steenkamp, Diaan Gouws, Julian Jordaan. Doelskoppe: Henry Immelman (5), Steenkamp (3), Erickson. Goudveld-Hoërskool 0.
Grey Barbarians 26 (10) – Drieë: Godfrey Simelane (2), AJ Barkhuizen, Julian Jordaan. Doelskoppe: Jordaan (2), Tokkie Kasselman. Welkom Gimnasium 16 (10) – Drie: SJ Malherbe. Doelskop: JL Carry-Smith. Strafdoele: Carry-Smith (3).
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
