Bestendige Conradie deurslaggewend in Zwarries sege
Nicholas Conradie, Hoërskool Zwartkop se voorste lopiemaker, se tweede vyftigtal in vanjaar se Finsbury-reeks was deurslaggewend in die span van Centurion se oorwinning Saterdag teen die Hoërskool Pietersburg.
Conradie het ‘n verdere 56 lopies op sy kerfstok geplaas, om by sy beurte van 94 lopies teen Ben Vorster en 39 lopies teen Marais Viljoen vroeër in die kompetisie te voeg. Zandré van Staden (32) en Wihan Gelderblom (26) het hom deeglik bygestaan.
Andreas Jansen het die Pieties met sy akkurate boulvernuf in die wedstryd gehou. Jansen se boulontleding van vyf paaltjies vir net 25 in sy tien boulbeurte op ‘n streep was die span van Limpopo se beste op die dag.
Hanno van Zyl (3/30) en Ignus Ferreira (2/31) se verdere bydraes het gehelp om die Zwarries tot slegs 185 lopies te beperk.
Die Pietie-kolwers het egter vinning agtergekom dat dit nie maklik sou wees om daardie totaal te jaag nie. Die Zwarries se aanvangsbouler, Rowan McLaren (2/36), het sommer vroeg reeds toegeslaan.
Pieties se staatmaker met die kolf Nicholaas Oerlemans het teruggeveg met ‘n hardnekkige beurt van 40 lopies. AJ Galloway (24) en Stephan Swanepoel (22) het die nodige ondersteuning gebied.
Goeie boulwerk deur die Zwarries se voorslag bouler, Vincent Matraiotti (2/14), en Liam van Wyk (2/30) het die Pieties egter gepootjie om ‘n oorwinning van 34 lopies vir die span van Centurion te verseker.
Midstream College het vir Ben Vorster van Tzaneen op ‘n drafstap met 113 lopies afgestof. Jeandré Lourens het ‘n goed afgeronde kolfvertoning met ‘n puik beurt van 56 lopies gelei. Jean Holtzhauzen (44) en Dian de Villiers (41) was ook mooi op dreef om Midstream College se totaal op 280 te staan te bring.
Die Black Caps se voorste bouler, Enock Marima (5/45), het die Tzaneeners se eerste vyftal paaltjies van die reeks geneem. Saam met Marima het die draaier Anton Lourens (2/44) ook vir die tuisspan probleme besorg.
Xander Senekal was die span van Midrand se suksesvolste bouler. Sy boulsyfers van vyf paaltjies vir 34 lopies het die Vossie-kolflys geknak. Slegs Njabulo Maseko (40) kon ‘n waardevolle bydrae lewer voordat hy deur Holtzhauzen pawiljoen toe gestuur is.
Die Vossies het hard terugbaklei maar kon slegs 168 behaal voor die laaste paaltjie gekantel het.
Marais Vijoen het sy uitstappie na Lichtenburg terdeë geniet. Die span van Alberton se kolwers het behoorlik gewoeker in hul oorwinning met 189 lopies oor Hoërskool Lichtenburg.
Tyron Bouw (106) het van voor gelei. Die aanvangskolwer het na ‘n vroeë paaltjie sy ritme gevind om die Liggie-boulers onder geweldige druk te plaas. Sy honderdtal het 11 viere en drie sesse ingesluit.
Nathan Coleske (70, 32b) en Jordan Baijnath (60*, 32b) kon daarin slaag om Marais Viljoen se lopietempo ‘n hupstoot te gee. Die twee se blitsbeurte het beteken dat Marais Viljoen ‘n reusetelling van 391 in sy toegelate 50 beurte op die bord kon plaas.
Ona Senokwane (4/69) het die meeste skade aangerig. Die naatbouler kon daarin slaag om onder druk deurgaans deurbrake vir sy span te bewerkstellig.
Douw Jacobs was die span van Noordwes se voorste kolwer. Hy het op sy beurt ‘n goeie 80 lopies van 107 aflewerings bygedra. Ongelukkig was Lethabo Memani (29) die enigste ander Liggie-kolwer wat iets met die kolf kon vermag. Dit het die Liggies in die moeilikheid gelaat en beteken dat hulle slegs 202 lopies op die bord kon sit.
Beknopte telkaarte:
Hoërskool Zwartkop 185 (Nicholas Conradie 56, Zandre van Staden 32, Wihan Gelderblom 26; Andreas Jansen 5/25, Hanno van Zyl 3/30, Ignus Ferreira 2/31); Hoërskool Pietersburg 151 (Nicholaas Oerlemans 40, AJ Galloway 24, Stephan Swanepoel 22; Vincent Matraiotti 2/14, Liam van Wyk 2/30, Rowan McLaren 2/36). Hoërskool Zwartkop wen met 34 lopies.
Midstream College 280 (Jeandré Lourens 56, Jean Holtzhauzen 44, Dian de Villiers 41, Maarten Nortje 24, Ricus Cilliers 24; Enock Marima 5/45, Anton Lourens 2/44); Ben Vorster 167 (Njabulo Maseko 40, Lourens Kriel 21, Enock Marima 21, Junior Ndlovu 20; Xander Senekal 5/34). Midstream College wen met 113 lopies.
Marais Viljoen 391/9 (Tyron Bouw 106, Nathan Coleske 70, Jordan Baijnath 60*, Aldré Huyzers 43, Declan Botes 28, Nathan Bailey 26; Ona Senokwane 4/69, Lethabo Memani 2/58); Hoërskool Lichtenburg: 202 (Douw Jacobs 80, Lethabo Memamni 29; Ruben Kruger 4/12, Abdullah Tadwala 3/35, Declan Botes 2/36). Marais Viljoen wen met 189 lopies.
- Maphaka earns maiden test call-up - 2024-12-01
- Fixtures for the 2024 CSA u16 Boys Week - 2024-11-29
- Kleingeld verruil Paul Roos vir Gimmies - 2024-11-26
