SuperSport Schools Plus

Beeldtrofee se kwarteindstryd bepalings vir 2014

By Hannes Nienaber , in Rugby | News , at 2014-08-04

Kempton Park se eerste span het wéér Waterkloof se Beeldtrofee-drome gekelder.

Soos verlede jaar in die halfeindronde van die Beeldtrofee het Kempies op sy tuisveld met sy sterk verdediging die swaarder pak voorspelers van Waterkloof gestuit en die wedstryd ná ’n dramatiese tweede helfte met 22-20 gewen.

Kempton Park kom nou in die kwarteindronde teen die Puma-kampioen, Nelspruit, te staan. Pennypinchers en Timbercity is medeborge van dié reeks.

Kempton Park was agterlangs baie gevaarlik, maar moes met krummels balbesit oor die weg kom, met Waterkloof se voorspelers wat een meedoënlose aanval ná die ander geloods het.

Die flank en kaptein van Kempton Park, Juandre van der Walt, was uitstaande op die verdediging en het telkemale balbesit by die afbreekpunte gekry.

Waterkloof se knaende aanval is beloon met ’n strafdoel deur sy SA Skole-losskakel, Tinus de Beer. Dit het sy span se rekening in die kragmeting geopen.

Kempies, wat in die lynstane gesukkel het om die bal te kry, kon hierdie keer met ’n dryfbeweging begin.

Met die Kempies op pad doellyn toe het De Beer die dryfbeweging laat val en is hy vir hierdie sonde met ’n geelkaart en ’n strafdrie teen sy span gestraf.

Kempies het ná rustyd sy aanvallende spel voortgesit, en die keerpunt van die wedstryd het gekom toe De Beer met ’n tweede geelkaart vir ’n professionele oortreding gestraf en afgestuur is.

De Beer, wat die wedstryd met sy geleerde skopvoet begin dikteer het, moes die res van hierdie helfte toekyk hoe sy span se drome verydel word.

Kempies moes ook vir ’n tyd weens ’n geelkaart sonder sy ­haker, Thinus Grundlingh, klaarkom.

​Bepalings vir die kwarteindstryde
Makroskole

Eerste spanne: EG Jansen t. Menlopark; Kempton Park t. Nelspruit; HTS Middelburg t. Monnas; Garsfontein t. Centurion.

o.16: EG Jansen t. Waterkloof; Nelspruit t. Garsfontein; Vereeniging Gimnasium t. Monnas; Florida t. Menlopark.

o.15: EG Jansen t. Eldoraigne; HTS Middelburg t. Garsfontein; Nelspruit t. Monnas; Menlopark t. Waterkloof.

o.14: EG Jansen t. Garsfontein; Kempton Park t. Nelspruit; HTS Middelburg t. Monnas; Florida t. Menlopark.

Groot skole

Eerste spanne: Pietersburg t. Transvalia; KHS t. Oos-Moot; Tuine t. Helpmekaar; Standerton t. Hugenote.

o.16: Pietersburg t. Piet Retief; Potch Volkies t. Linden; Oos-Moot t. Helpmekaar; Ben Vorster t. Ermelo.

o.15: Ben Vorster t. Hugenote; Lichtenburg t. Tuine; Oos-Moot t. Helpmekaar; Hoogenhout t. Transvalia.

Hannes Nienaber